סי יא תיינס ראזון
דספואס קה תומי און פוקו דה "פסק זמן" אי אל קומפיותר סה אתורנו א לאב'ורר ב'וס קיירו אסקריב'יר און קוריוז דה פורים, אפ'ילו קה יא תאדרי. לה סמאנה פאסאדה אן פורים מי נוארה תומו לוס תריס פ'יז'וס אי סה חואה א חולון פארה ב'יר לא עדלאידע. אי יו, אנתיס מוצ'וס אניוס, קואנדו תנייה איינדה סולו דוס פ'יז'וס לוס תומי א תל אביב פארה ב'יר לה עדלאידע קה ארה, סי נו תנגו ירו, לה פרימה ב'יס דספואס דה לה גרה. סאלימוס ד'אל מושב תנפראנו לה מאניאנה קון אל פרימו אותובוס אסתה נתניה אי איי קון און אותרו א תל אביב, אי אותרו אונו קה מוס תומו א" הרבט סמואל" אונדה דב'יאה דה פאסאר לה עדלאידע. אריב'ימוס איי אי אנפסימוס דה פרקוראר פארה תופאר אלגון לוגאר קה סה פואדה ב'יר בואנו דה איי לה עדלאידע. קאמינימוס באסתאנתה קאמינו אסתה קה תופימוס און לוגאר קון פוקה ג'נתה אי מוס קדימוס איי. אספרימוס באסתאנתה תיימפו אן פייס אי לוס צ'יקוס סה אנקאסארון אי ליס פאסו לה פאסיינסה. אמה קואנדו יא סה אםפיסו סינתיר לאס בוזיס אי לה מוסיקה דה לעדלאידע אן סופיתו, ב'יניירון מבול דה ג'נתה אל לוגאר מואסתרו אי מוס אפרתארון אי מי פ'יז'ה קה תנייה מוב'ה דייס אניוס סה אנפסו דה אפ'וגאר. אי נו תנייה רמדיו סולו תומארלה א מיס אומברוס. אנסינה לה דתיני נו סה קואנתו תיימפו אסתה קה פאסו לה עדלאידע אי לה ג'נתה סה אנפסארון דה דספאראסר. לו קה לו סה סיגוראמנתה אס קה אסתה אוי מקונסיינתו לוס אומברוס תויידוס! לה מדיודיאה תורנארון מי נוארה קון לוס פ'יז'וס אי מוס קונתארון קה נו ב'ידון נאדה אן חולון פורקה אב'יאה תאנתה ג'נתה קה לוס אנפושארון אי לוס אפ'וגארון אסתה קה סה ארנפיתיירון אי סה אתורנארון א קאזה!
