לה מגילה....
אל ריי אחשוורוש
אנב'יטו אל פואב'לו, אה אונה פ'ייסטה גראנדה, דה סייטה דיאס, פארה קה ב'ייגאן טודוס לה ריקזה דה אל.
אל איזו פ'ייסטה פור לוס אומברס
, אי ושתי, לה מוז'ר, איזו פארה לאס מוז'רס.
אן אל קאב'ו דיה, קואנדו אסטאב'ה און פוקו בוראצ'ו
- מאנדו אה לוס מוסוס אה טראייר לה אה ושתי. קרייה אל ריי אמוסטראר אל פואב'לו, קה ארמוזה מוז'ר טיינה.
חלבוקי, ושתי נו קיז'ו ב'יניר. סה אניירב'ו מונצ'ו אל ריי אי סה לה סוב'יו לה סאנגרה אל מאויו: אנסינה? מה ב'ה אזר ריזיל דלאנטרה דל פואב'לו?
אגורה לה ב'ו אמוסטראר! מה ב'ו טומאר אוטרה מוז'ר, מאז מאנסב'ה, מאז ארמוזה, אי לה ב'ו אזר ריינה אנלוגאר דה ושתי! מורדוכי
, אל ג'ידיו, ארה אונקלה דה אסתר. אסתר ארה מאנסב'ה ארמוזה
אי קואנדו סינטיו מורדוכי קה אל ריי אסטה בושקאנדו מוז'ר מואב'ה, לה טרושו פישין אל "אודישן" אנטרה טודאס לאס מאנסב'אס, לה גוסטו אל ריי סולו אסתר, אמה אייה נו קונטו קה אס ג'ודייה. פאסו און אניו אי אל ריי מטיו לה קורונה
אן לה קאב'סה דה אסתר, אי לה איזו ריינה. סו אונקלה מורדוכי, סה אסנטאב'ה קאדה דייה אן לה פוארטה דל פאלאסיו. און דייה סינטיו דוס מוסוס דל ריי אב'לאנדו קה לו קרן מאטאר אל ריי. פישין סה פ'ואה אנדה אסתר אי לה קונטו לו קה אסטה פאסאנדו.
אסתר לה קונטו אל ריי, אי אל דישו: אנקולגאר אה לוס דוס מוסוס אנריב'ה דה ארב'ולה!
דספואס קה סה מוריירון, סה איזו המן
אל איודאדור גראנדה דל ריי. קואנדו פאסאב'ה המן סה אצ'אב'אן טודוס אנריב'ה לוס דיזיס, סולו מורדוכי נו אקספטו אבוקאר סה. המן סה אניירב'ו מונצ'ו אי קיז'ו מאטאר אה מורדוכי, אי אה טודוס לוס ג'ידיוס. סה פ'ואה המן אנדה אל ריי, אי לה דישו: לוס ג'ידיוס סון נגרה ג'נטה סי לוס ב'אמוס אה מאטאר אה טודוס לוס ג'ידיוס, טה ב'ו טראייר מונצ'אס פאראס אי אורו.
אל ריי אקספטו, אי מאנדו לטראס:
"אה טודוס לוס ג'ידיוס ב'אש אה מאטאר אן און דייה!" מורדוכי, קה סינטיו אסטו, סה ב'יסטיו סאקו רוטו, אי סאליו אה לאס קאלז'אס גריטאנדו אה לוס ג'ידיוס: "אזה תעני! פור קה מוס ב'אמוס אה מוריר טודוס!" לוס מוסוס דה אסתר לה קונטארון לו קה אסטה אזיינדו מורדוכי. איה סה פ'ואה אנדה אחשוורוש, אי אל ריי לה דישו: קואלו קה ב'אז אה דמאנדאר - פ'ין לה מדייה ריינורה טה ב'ו דאר!
ב'ן אמאניינה, אי טה ב'ו קונטאר, דישו אסתר.
אחשוורוש טנייה און ליב'רו
קה אסקריב'יה איה טודו לו קה פאסה. אה לה נוצ'ה, נו טנייה אספ'ואניו
, טומו אה מלדאר אל ליב'רו אי טופו אייה קומו מורדוכי לו סאלב'ו דה לוס מוסוס קה לו קרייאן מאטאר. לו יאמו אה המן אי לה דמאנדו: קואלו איב'אס אזר סי קרייאס דאר הונור אה אונו? המן, לה פארסיו קה אז הונור אה אל - פישין דישו: לו איב'ה ב'יסטיר קומו און ריי, קון קורונה אן לה קאב'סה, אסנטאדו אנריב'ה דל קאב'איו דל ריי, אי אנסינה קאמינאר לו אן לאס קאלז'אס, קה טודוס ב'ייגאן.
בראב'ו, לה דישו אל ריי, אגורה ב'אס אזר אסטו אה מורדוכי!
אי אנסינה לו קאמינו המן אה מורדוכי אן לאס קאלז'אס. אה לה נוצ'ה יאמו אסתר אל ריי אי אה המן, בב'ר קון אייה ב'ינו
. דלאנטרה דה המן לה קונטו אל ריי קה המן קרה מאטאר אה טודוס לוס ג'ידיוס, אי אה אייה - פור קה אס ג'ודיה! סה אניירב'ו אל ריי אי יאמו אה לוס מוסוס קה לו אנקולגן אה המן אן לה ארב'ולה.
אי אנסינה, דה לה אלגריה קה אסתר לוס סאלב'ו אה לוס ג'ידיוס טנמוס אל דיה דה "פורים".
אל ריי אחשוורוש
